財務B在佔領區「蹲點」，得到一個印象係年青人認為人人有居住權，香港樓價太貴，令年青人對於買樓一事，幾近絕望，覺得成世都會係無殼蝸牛，家無恒產，輸無可輸，同「不合公義」嘅特區政府死過，並無機會成本。
梁錦松在團結香港基金會成立儀式上發言，有提及年青人買樓難呢一點，梁振英喺佢嘅網誌推銷新居屋發售，亦講及青年人買樓，乘機大嘆香港搵地起樓難（因各區都有人士反對在當區興建公屋，保育環保人士反對發展新界東北），呢兩位重量級人物嘅「人人有屋住」論點，與財務B訪查所得，並無不同。
香港愛與倫敦紐約並稱紐倫港為世界三大金融中心，倫敦紐約嘅財富不均情況，與香港冇乜大差別，倫敦紐約（主要係曼赫頓）嘅樓價又係貴到飛起，此兩大城市又如何解決年青人上樓難嘅問題？十年前肥仔K在倫敦讀碩士之時，樓價冇依家咁貴，但學生租樓住已經付出好高租金，兩睡房單位嘅每星期租金係450英鎊，佢去一間學生宿舍大樓租一間有獨立廁所嘅大房（約兩百呎）與家姐同住，月租一千鎊，帶佢去租房嘅房地產經紀話：「我地英國人住唔起倫敦，我每朝返工要坐個半鐘頭火車。」
曼赫頓亦如是，小YY在紐約大酒店工作時，為方便及安全計，係要住在曼赫頓，每月薪水交完租，工會月費及預扣稅後，已經所餘無幾，所以好計較收貼士。
紐約倫敦以至在東京工作嘅美英日年青人，極大多數住在市區以外，每日坐火車地鐵個幾兩個小時返工，以香港路程計，相等於要住上深圳、東莞常平。不過呢，當今本港年青人本土意識濃厚，抗拒中港融合，邊度肯北上居住，每日回港上班呀？最遠咪去到新界東北，如果反對開發無效嘅話。世界科技之都，矽谷嘅租金又係好貴，樓價屬豪宅級，唔係蘋果、Google啲幸運兒（有認股權嗰班），難以負擔。三藩市租金高昂，不在話下，市政府幾十年來保護租客實行嚴格租金管制，結果益咗邊個？就係五六十歲嘅「老三藩市」人，年青人無緣享受（因老租客點都唔搬）。睇完外國經驗，香港可以點？左丁山諗唔通，聰明人如梁錦松，如果要有所作為，一定要「迎難而上」，諗掂如何解決青年人住屋問題。