爸爸是一代宗師劉家良，母親是前女星、律師翁靜晶，劉家大女、27歲的劉萬儀手執兩個律師牌，依然決定入行做明星。3歲開始習武的劉萬儀，對爸爸最深刻印像，並不是武功高強、片場群星徒弟，而是小時候，劉師傅大汗淋漓在廚房為她們煎的一碗溫情荷包蛋飯。但志向做法援律師，宏願是弘揚武術的劉萬儀，這一年只想追夢拍片，不做俠女，做一個有型的女蝙蝠俠！
撰文：林妙萍
剛踏進蘋果大樓，劉萬儀（Jeanne）即說：「呢一啲係我焗嘅earl grey曲奇，大家試吓，我過兩日要參加比賽。」原來喜愛烹飪的翁靜晶大女Jeanne帶了曲奇餅，第一次來到蘋果大樓拍studio shooting，而原定會陪在她身邊的母親翁靜晶最終沒有出現。在Jeanne身上，可以看到三個元素：爸爸劉家良師傅的武、媽媽翁靜晶的文，還有27歲女孩子的率真。
自小鍾意演戲
香港長大，18歲到美國讀書的Jeanne，考取了香港、新加坡的律師牌，並準備考美國律師牌。回港卻簽約加盟樂基兒的模特兒公司Calcarrie's入行，「我由細到大，都傾向想做戲劇，或者同演技有關嘅創作，其實我喺外國已經讀咗戲劇班，我喺紐約已經開始發展，香港就未。」懂得打功夫，最正路當然做武打女星，她大笑：「俠女，哈哈哈，希望我可以啦，但我想做女蝙蝠俠，有型啲喎。」翁靜晶謂不知她入行，「其實媽咪都知，佢睇過我啲戲劇片段。」直言對自己要求也嚴格，只想花兩年時間發夢。兩年……許多藝人連名字也未有人認識，「唔會啩！咁點……咁咪好慘……」
念父荷包蛋飯
洪拳宗師、黃飛鴻第四代傳人的劉家良，50年代進軍影壇，開創香港功夫電影潮流。Jeanne3歲開始習武，劉師傅放工回家，就在後花園教她紮馬、練氣功，「嗰個時候覺得好辛苦，𠵱家就唔覺；我𠵱家練緊雙劍，一個星期練三日，覺得呢個最有型。」她即場示範五形拳，舞刀耍劍影相，出動師兄Mark指導擺甫士，不敢怠慢。
Jeanne接受訪問當日帶了多件兵器到場，其中一把劍是祖父劉湛、傳給劉家良，再傳到她手上，「阿爸細個帶我去拍片現場，睇啲武師擺甫士，我就攞住啲兵器搖來搖去。」劉師傅傳授中國功夫「好溫柔」，更教她聽Beatles及Tom Jones的歌，看奇連伊士活的戲，腦海中最深刻回憶是一碗荷包蛋飯，「嗰時去新加坡旅行，媽咪出咗去做嘢，剩低阿爸、細妹同我自己，到食飯時，我哋年紀太細煮唔到飯，阿爸好勉強咁煮咗碗飯畀我哋食，佢煎咗隻荷包蛋，再加啲美極汁，係好普通嘅煎蛋飯，但係係我一生中最好食的一餐飯。」Jeanne講到這裏不禁眼濕濕。
承母修讀法律
揚言不知阿女入行的翁靜晶，其實背後亦悄悄打點支持。阿媽出名嚴謹，但鬧人一定講道理，「佢係偏嚴嘅，但唔會無端端鬧人，一定會解釋點解佢會嬲，大家講道理箒。」翁靜晶和劉家良年齡相距30年，翁靜晶婚後才讀法律、做律師，她也鼓勵女兒讀法律幫人及保障生計，「佢最大要求係我哋要讀好書，起碼要大學畢業，其他就由得我哋。」兩母女現時變了好朋友，一齊行街shopping 。
武家講求智仁勇，Jeanne也有這份鋤強扶弱的心思，闖完演藝圈後，下一步會做法律援助工作，皆因在新加坡律師實習期，她見證過一個小販辛苦半世養妻活兒，卻因犯了小事不懂自保而坐牢。文才武德，幫人也要有能力，Jeanne：「我嘅idol唔係任何明星、演員，係我父母，佢哋係我最好的榜樣。」
造型：鄧卓嶽
化妝：Kylie Chan
服裝：DKNY，Dion Lee
【 Profile】
年齡：27歲
家庭：
父為洪拳宗師劉家良
母親為律師翁靜晶
家中長女
學歷：
英國University ofExeter法律系畢業（Law IIB）
英國Colleage of Law（法律課程）
新加坡國立大學（大律師）
紐約The Lee Strasberg Theatre and Film Institute修讀方法演技
嗜好：
烹飪、整餅、功夫、
玩X-Box、唱歌、
寫短篇故事
喜愛電影：
《瘋猴》（1979年由劉家良執導及主演）
【三個粉絲去首爾】
追星實錄，即上韓劇讀: http://hk.apple.appledaily.com/kstar