【中環】巨星幫出身、現年25歲嘅羅孝勇自從去年狠撇林欣彤冇耐，身邊就經常出現一位長髮索女，呢對熱戀男女已經去到旁若無人黐到實嘅境界。繼早前畀本報踢爆佢哋拍拖去樓上店買情趣內衣之後，前晚又見到佢哋孖公仔咁行街。
糖黐豆唔離身
前晚大概7點，羅孝勇同長髮女友雙雙出現中環石板街，兩個人當街傾偈，細聲講大聲笑，長髮女仲不時攬住羅孝勇條頸非常親密，當街玩足十分鐘後佢哋先至起行。佢哋先沿住石板街手拖手向上行，一直行到一間超級市場，臨入去時羅孝勇好猴擒咁用右手沿住女友背脊直掃落腰。接住兩人推住部超市手推車，一路交換意見一路掃貨，以日用品及零食為主，行咗約15分鐘兩人先畀錢走人。
頭貼頭玩電話
攞住一袋超市用品嘅羅孝勇同長髮女，跟住行咗入一間西式餐廳面對面坐低。佢兩個話題真係冇完嘅時候，坐低又傾咗5分鐘，原來佢哋坐係度只係等外賣。攞完外賣兩人繼續行向半山方向，一直行到楊其龍開個間夜店Dragon-i嗰幢商廈度。以為佢哋準備夜蒲，原來只係等電梯上樓，等電梯期間羅孝勇攞咗部電話出嚟，仲開咗條片畀女朋友睇，長髮女笑晒口乘機同男朋友頭貼頭睇片。
採訪、攝影：楊浩賢、梁繼光
【三個粉絲去首爾】
追星實錄，即上韓劇讀: http://hk.apple.appledaily.com/kstar