當年星爺喺《國產凌凌漆》入面扮國產特務，佢就有個「篋神」秘密武器，估唔到成日俾左派話係「境外勢力」嘅美國駐港總領事夏千福BB，一樣有秘密武器，不過就唔係「篋神」，而係自己變身做「𨋢神」，向女士主動發出「攻勢」。
來港決心為女士平權
話說千福BB噚日現身美國商會搞嘅「最具影響力的女性」頒獎禮，做咗32年外交官、見盡重大世界議題嘅佢，就由兩次世界大戰、發明核彈嘅事講起，話科技進步呢啲嘢，都唔係最影響二十一世紀嘅事，而係性別平等概念，先為人類喺過去140年帶來進步同埋快樂，佢自己都好想睇睇200年後，性別平等會為人類帶來乜影響。
佢又大讚香港有全亞洲最多女性中高層管理人員，香港班女強人認真頂呱呱，但係有好多位高權重嘅女領導，唔等於男女平等問題解決咗，佢仲憶述舊年初嚟香港報到後，為美領館定下其中一個重要目標，就係處理好婦女問題，等女士們更加平權。
千福BB絕對唔係齋講唔做，所以噚日活動結束後，佢就身體力行，化身做𨋢神，同酒店女職員戙喺𨋢門外頂住度門，等一眾女士們先入𨋢，紳士風度簡直爆晒燈，完美演繹Ladies First精神。美中不足嘅，就係女記者都好想千福BB講講學聯上京、佔領行動等議題，可惜千福BB一心只講女性、不談佔領，惟有以讚揚女記者「好有心」嚟婉拒，希望佢下次幫幫手開金口啦。
李八方
mailto:[email protected]