「南華內亂之唇槍舌劍」南華內亂有新發展，除咗有擁南躉喺討論區發起罷睇由「油王」張廣勇帶領南華所有賽事外，隊中首席中鋒陳肇麒日前喺fb發表「李公公」言論後，正喺台北同港隊名譽領隊張廣勇睇波嘅李輝立，忽然對號入座同陳七爆發隔空駡戰。
擁南躉網上發起罷睇
自從守門員教練范俊業同副領隊許家銓「被辭職」，引發內亂嘅少林寺噚日晨操，我求大俠當然去探吓班和尚仔啦，雖然佢哋好落力咁訓練，但全隊冇乜交流，到收操先叫做有啲聲氣。觸發事件嘅前厄瓜多爾國腳龍門摩拉就因傷齋坐唔使練。今次內亂事件，唔少擁南躉認為係班主縱容外援所致，所以就喺網上發起罷睇事件，仲話會現場拉banner撐范俊業，以示對油王張嘅不滿。
「你唔好自己對號入座」
南華前鋒陳肇麒日前喺fb留言回應今次內亂事件：「小人當道！李公公不停發功。若要人不知除非己莫為！」暗指「李公公」係今次背後搞事嘅主角；當球圈好多人都估邊個係李公公嘅時候，現時同流浪會長莫耀強、張廣勇喺台北捧港隊場嘅流浪總監李輝立（Philip），竟然越洋留言回應陳七：「從小我對你的愛慕，太令人心痛，做朋友不傷害、不負累，小人當道是那些以小人之心度君子之腹之小人物，我去台北支持香港隊是陪伴我流浪會長莫耀強，那管你南華家事。」
被要求收回言論嘅陳七即時反駁：「李公公=李輝立？從來我都冇話過李公公係邊個？你就唔好自己對號入座！有冇做任何嘢自己知啦，朋友係用嚟幫嘅，唔係用嚟出賣嘅！係喎，我哋係朋友嚟㗎咩？」呢段喺fb嘅私人對話，唔知點解俾高登巴打放上網，網友仲一面倒撐陳七夠薑㖭！
盛傳重返南華平亂嘅前南華隊長陳炳安噚日都有到場睇球隊晨操，佢話做咩職位唔緊要，目前正了解問題，遲啲同足主見面，下禮拜一就會隨隊去三水集訓4日。南華教練楊正光澄清今次集訓其實一早計劃好，同事件絕對冇關係喎。至於前日喺東錦外輸咗畀北韓嘅港隊，中場聶凌峰受傷，聽晚對唔對到中華台北都未知。
識睇，一定係睇足英台【英波Live】：
http://soccer.appledaily.com
http://bit.ly/engballlive