反佔中嘅喜記老闆涉嫌「裙底炒蟹」非禮女士俾網民杯葛，生意插水，雖然班反佔中藍絲話要撐佢，連禮義廉嘅Tree根都帶頭去幫襯，不過睇嚟冇乜用，所以喜記要搞搞救亡宣傳，但唔知點解，佢連救亡宣傳都要鬼鬼祟祟做喎。
話說有網民見到喺某份免費報有一個廣告，有間食店以「一蚊一隻蟹」宣傳招徠食客，但係廣告入面，竟然冇提過食店寶號，只有地址同訂座電話。
網民見到廣告有隻蟹，仲要咁鬼鬼祟祟登廣告，自然查查係邊間名店，一查之下，果然真係聞名省港澳嘅喜記！唔怪得之連名都唔敢登！以為唔登名就冇人知，真係當人儍嘅咩？
仲有心水清嘅老友同八方講，根據《商品說明條例》第13E（4）條，若果某營業行為屬於購買邀請，有啲資料屬重要資料就唔可以唔提供，當中包括「有關商戶的身份（例如商業名稱），以及該商戶所代表的任何其他商戶的身份」，咁如果廣告冇提商戶名，算唔算冇提「重要資料」？又有冇違反《商品說明條例》？喜記會唔會宣傳不成，反而俾人投訴違法呢？