蘇亞雷斯喺巴塞隆拿仲未入到波，但返到去烏拉圭國家隊果然係醒神啲，周四友賽主場出戰哥斯達黎加有入波又有助攻，可惜嘅係阿蘇踢到衫都爛埋，烏拉圭都係贏唔到。
阿蘇𠵱家仲係帶罪之身，雖然球會級嘅停賽期已經完結，但喺國家隊正式比賽依然被禁上陣，要在出年美洲國家盃之後先解禁；不過周四烏拉圭主場迎戰哥斯達黎加只係友賽性質，阿蘇可以披甲。
對手扯爛衫照助攻
哥斯達黎加喺今夏世盃分組賽曾經贏過烏拉圭，今場波亦由艾華路沙保利奧先開紀錄。易邊後烏拉圭由阿蘇扳平，雖然好快就畀拜仁雷斯入番粒再次落後，但主隊喺64同67分鐘連入兩球反超前，其中第3球係由阿蘇左路發難，畀對手扯爛衫再助攻畀卡雲尼搞掂，盡顯功架。不過烏拉圭都守唔到優勢到尾，哥斯達黎加喺補時階段由雲尼加斯建功追成3:3，再喺互射12碼以7:6射贏烏拉圭。
識睇，一定係睇足英台【英波Live】：
http://soccer.appledaily.com
http://bit.ly/engballlive