以為專欄仔冇咩人留意，宗伯擒日上嚟會所即刻就話四眼仔啲八卦嘢都幾靈通，講完對眼望住我，我就真係唔敢隨便答佢，容咩易以為我老作咪死得。
宗伯睇波通透行內個個都知，我將話題一轉就去咗歐洲國家盃外圍賽問佢點睇，佢即刻鬧：「死仔，寫時寫，唔好教壞人！」跟住就話：「見你順開，今個禮拜場歐國盃外圍賽英格蘭對斯洛文尼亞同埋西班牙（圖）對白俄羅斯，『角球大細』都係開11.5球，『大』有1.8倍同1.77倍，乘埋有成3.2倍，係唔錯㗎！」
佢老人家其實好心水清，記得今年5月尾流浪漢同西甲雙雄喺香港打嗰場友誼賽，佢睇完華倫西亞件小將前鋒柏高艾卡沙，就話：「呢件一定非池中物！」今季冇耐已經做埋大國腳，近兩場仲踢到會飛咁；佢話：「球隊有呢類前鋒一定攞到角球，而英格蘭方面更加唔使擔心，放心玩吓喇。」我聽聽吓心諗都唔知佢話邊個教壞人！
講講吓佢又將話題扯番去四眼仔單八卦嘢，問我知唔知大會炒人單嘢點搞，副領隊點解要離隊，我又即刻話番佢老人家唔好學人咁八卦喇！正所謂不在其位不謀其政，搞好自己隊波先喇，香港球迷個個都識睇咩事喇，無謂俾位人入，到時啲口痕友唔畀面，叫你做宗公公咁就真係無晒癮喇。
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive