自2000年之後，只要有錢，瞌埋眼隨便買物業，到最近沽出埋單計數，基本上均賺錢，但凡事都有例外，好似日本城老闆兼「家品大王」馬主劉栢輝就係「異數」，佢早前沽出一個何文田半山壹號單位，持貨四年居然慘蝕2,000萬，連埋使費更遠唔止此數，成為該屋苑歷來最大蝕讓紀錄。
劉栢輝等錢使要套現咩？梗唔係啦，佢賣完半山壹號，轉過頭用8,500萬買入肇輝臺6號一個新盤，擺明就係換貨，不過新盤將來嘅「勝負」要拭目以待，但半山壹號嗰2,000萬蝕咗就係蝕咗，唔肉赤就假咯！
劉栢輝想追數嘅話，除咗希望日本城生意好啲之外，當然亦希望「家品大王」喺今期賽事報捷，贏啲獎金幫補吓。呢匹馬嘅質素唔錯，上仗初跑泥地，末段展現凌厲後勁，連追多個馬位得亞軍。拼後相隔個多月，期間乜路程都唔跑，就係要養精蓄銳，等今期再戰泥地1200米，明顯鬥志十足，隻馬升班換梁家俊，足足比上仗輕18磅，練馬師文家良剛戰贏「一團威」及「摯友無敵」起孖，馬房旺氣逼人，隨時幫劉栢輝愛駒打開在港勝門！