一個女仔，令英文科補習天王Richard Eng（伍經衡）決定告別做咗30年嘅補習界。呢個女仔唔係佢藝人妹妹伍詠薇，而係佢個明年升大學個女。Richard噚日發表告別宣言，標題係「追求平淡 告別香港 另覓人生方向」，話為人師表30年係人生樂事，但早前淡出教育界，重回大學進修，「才發現自己性本愛幽山，亦非常享受與女兒一齊學習的時光」。佢話新方向係做義工，唔通想學陳葒校長搞免費補習學校？Richard姨仔、遵理主席June Leung爆料，指實情係因為Richard阿女明年要去美國讀書，佢唔想一家分開，所以一齊去美國。June又話Richard已冇教學一年，一早做好接班工作，唔擔心教學安排喎。