代表潮聯公共小型巴士嘅律師陳曼琪近期相當出位，繼上個月喺旺角拒絕撐傘、冒雨宣讀禁制令，又同一班阿公阿婆喺法庭外做獻膠花大龍鳳，噚日又成功搶鏡，趁電視台直播記者扑咪訪問佢時朗讀禁制令。
呢位來自民建聯嘅陳律師，噚日晏晝散庭後一如以往到大樓外接受訪問，點知記者一roll機，陳律師手持法庭已蓋印嘅臨時禁制令同貓紙，即席向鏡頭宣讀禁制令內容。記者都清楚禁制令內容，已經好有耐性咁畀佢講咗好大段，但終於忍唔住打斷佢，要求佢回應提問，點知佢仍然堅持繼續讀，記者只好照問問題，氣氛僵持。
就喺呢個時候，陳偉業孖住反對禁制令嘅吳定邦離開法庭，記者即轉場去訪問佢哋，被丟低嘅陳曼琪交足貨，繼續獨對空氣高聲宣讀禁制令，唔知讀畀邊個聽呢？