西班牙（圖）唔封殺碧基呢啲支持加泰隆尼亞獨立嘅球星，牽牛兄話係當權者嘅大量，但小弟掉轉嚟睇，西班牙用加泰隆尼亞球星係統戰手段。就好似北京奧運，點解會畀香港搞馬術，雖然官方有一大堆咩香港硬件好呢類理由，但講到尾，就係想香港一齊參與呢件祖國盛事，增強港人對內地嘅歸屬感。
加泰隆尼亞人踢西班牙國家隊，就係想畀加泰人睇，佢哋可以同整個西班牙一齊奮鬥。相反，如果郁啲就封殺，只會刺激到加泰人嘅民族情緒，加劇加泰人爭取獨立嘅行動，正如香港警方向示威者掟催淚彈一樣，強硬手段只會引來更大反響。不過講到封殺，西班牙的確唔多妥一個地方，就係直布羅陀。
喺今屆歐國外抽籤入面，直布羅陀明明抽到同西班牙一組，但點解會調咗組？唔係柏天尼搞搞震，而係兩國因為有領土爭拗，唔可以喺比賽入面碰頭。喺幾百年前嘅西班牙皇位爭奪戰，英國派兵幫手，係戰勝一方，分到直布羅陀做英國屬地，但西班牙就一直想要番直布羅陀。
喺直布羅陀問題上，英國冇自己揸主意、叫直布羅陀回歸西班牙，而係叫直布羅陀人公投決定，願唔願意畀英、西兩國共同統治，結果大比數否決咗。西班牙一直認為直布羅陀係自己領土，反對佢哋加入歐洲足協，但少數服從多數，好多歐洲國家都同意下，直布羅陀終於可以參加歐國盃。
文：咖喱