靠中國歌唱比賽一夜爆紅嘅香港女歌手，近期傳出被國內封殺，係唔係因為佔中仲係未知數。不過，已經傳嚟佢爆喊新聞，相信已經背靠祖國嘅「爛片王」大導亦都出手贈㷫。
多得回歸以嚟愛國愛港嘅商人同傳媒不斷洗腦，香港冇強大嘅祖國撐腰就活不下來。中央對香港咩政策都係送大禮，開放自由行又係，cut自由行又係，賣東江水畀香港又係，買香港電又係；香港人一聽到封殺就面都青，其實已故傳奇歌星鄧麗君夠俾祖國長期封殺，佢喺祖國咪又係一樣勁紅；當年周星馳電影仲未可以正式打入祖國市場，《西遊記》咪又喺國內街知巷聞。只要有實力，就算係世仇，祖國都係包容，所以香港人唔好認低威，企硬。
講起分裂祖國，加泰隆尼亞想搞獨立咁多年，尤其唔少巴塞隆拿球星好似碧基、沙維等都企出嚟支持，星期日仲搞模擬公投。以祖國人嘅邏輯，呢啲巴塞球星簡直就係「反西亂加」啦，邊有可能唔封殺佢哋。
不過，新一期西班牙國家隊名單，巴塞兵仲有5人，仲係最大戶，連冇咩機會正選嘅柏度洛迪古斯（前）、馬斯巴查都入選，對祖國人可以話係難以理解；不過文明西方大國，對不同政見都好包容，唔會話吓吓就封殺，呢啲先係當權者應該有嘅氣量。
文：牽牛