今季西岸太多黑馬跑出，搞到拓荒者好似冇乜人理咁。佢哋周三作客金塊就半場瘋狂入84分，以呢場130:113嘅大勝吸引觀眾嘅注目，可惜吖，都係唔及再輸一場嘅湖人多人留意。
拓荒者半場已經贏緊84:50，搞到成個下半場變咗垃圾時間。兩隊各自嘅13位球員全部都有出場，刷數據人人有份；只有兩位唔好彩咁冇分落袋。今次交出27分嘅拓荒者控衞尼拉特就話：「呢個數字（84分）係你打晒全場先有嘅分數。」金塊教練梳爾都覺得冇面見人，賽後記者會只出嚟講咗兩句就急急腳走人。輸得咁醜都唔使喺西岸包尾，金塊真係要多謝湖人又輸仍然墊底。
湖人拜恩就繼續無限射tough shot，以33分做全場「得分王」，但就作客以102:109輸畀塘鵝。塘鵝大前鋒安東尼戴維斯全場6次封阻，仲拜恩都夠膽block。湖人今場喺顏色地帶失咗60分，教練史葛嬲爆：「我叫佢哋做嘅嘢都冇做到，我唔知佢哋係唔肯做定做唔到。」但湖人總算有好消息，尼克楊格話隻手指公好得七七八八，希望喺下周二對鷹隊復出。
識睇，一定係睇足英台【英波Live】：
http://soccer.appledaily.com
http://bit.ly/engballlive