上市公司股東會一般以點心、西餅招呼小股東，最近獲謝霆鋒注入後期製作公司PO香港嘅漢傳媒（491）就相當別出心裁，喺股東會上，除咗有例牌嘅美點雙輝，仲派電影DVD同藝人賈曉晨JJ寫真集，唔知明年股東會會否派謝霆鋒主演嘅電影DVD同埋王菲唱片呢？
漢傳媒噚日向在場股東派嘅產品，包括旗下藝人賈曉晨JJ寫真集《七日程》，仲有公司發行嘅電影《人約離婚後》、《潮性辦公室》等等，似係順便清貨囉。
小股東都唔係掛住食同拎，會上都有小股東問管理層，係邊位引入謝霆鋒做大股東，由於謝霆鋒注資畀漢傳媒呢單刁要等小股東投票通過，仲未正式成事，所以謝霆鋒噚日冇現身，公司管理層亦冇答小股東。但小股東依然合作，會上所有決議案都以零票反對全部通過。