秋意濃濃，最適合去日本或韓國賞紅葉。八方同好多香港人一樣，最頭痛係當地言語不通，有時講句英文都雞同鴨講。但有間私人教育機構噚日發表「英語能力指標」報告，聲稱調查全球63個國家、75萬名成年人嘅英語能力，香港排名31，仲低過韓國（24）、日本（26）同台灣（30）。八方聽見個結果巧驚驚，唔通個個香港人都變咗Tree根鍾樹根？I don't think so囉！
負責呢個調查嘅機構叫英孚教育（EF Education First），齋睇結果都幾嚇人，香港人嘅英語能力唔單止渣斗過日、韓，報告仲話上海嘅評分更首次超越香港，中國一線城市地位被邊緣化。EF港澳區總監趙崇基話，喺香港至少收集咗一萬人嘅英語水平測試數據，評估項目包括語法、詞彙、閱讀和聽力。聽落好有信服力，之不過，呢一萬人係點抽樣出嚟呢？
原來個調查係自願性質，任何人上佢哋個網站都可以免費做英文測試，數據就喺呢度嚟。八方有理由相信，Tree根肯肯定做過呢個測試，聽佢左一句「dreaming on your office」，右一句「I don't think so囉」，曲線拉低港人評分都唔出奇。
田二少請人 寧要普通話好
唔止八方詫異，連獲邀出席發佈會嘅田北辰都話，測試係自願性，代表性存疑，「有少少偏見」；若講日本人、韓國人嘅英語能力好過香港人，「我相信好多人都唔同意」，結果不能盡信。佢仲話香港背靠中國，自爆旗下時裝連鎖店，請人寧願普通話好都唔要英語好喎。但補飛講句，香港唔可以放棄國際市場，但現時教育制度只重考試，令學生冇乜推動力學好英文。
教育局回應話，接受測試嘅人係自選自薦，未必可靠反映參與國家或地區嘅整體英語水平，而測試只喺網上進行，冇得上網就冇得做，認為指標測試嘅結果不具代表性。
李八方
mailto:[email protected]