事隔3年，泰維斯終於返到阿根廷國家隊比賽，最有意思嘅係，呢場比賽喺前球會韋斯咸主場烏普頓公園踢，泰仔受到熱烈歡迎，好似有半個主場咁樣。但講到最威，都係非美斯莫屬，佢入波又助攻，帶領阿根廷以2:1反勝克羅地亞。
自從沙比拿做阿根廷教練後，泰仔就冇運行，成3年幾冇得踢國家隊，直至今屆世盃後沙比拿走人，馬天奴接手，泰仔終於可以着番件阿根廷波衫，喺英國倫敦嘅烏普頓公園對克羅地亞。呢個韋斯咸主場係泰仔當年喺歐洲嘅成名地；嗰陣係06/07球季，泰仔幾乎一手一腳幫「槌仔幫」護級成功。
賣口乖自稱頭號粉絲
佢賽前已經好識講嘢，不斷多謝韋斯咸，「呢場波會係我嘅主場比賽，我好熟悉呢個球場同埋球迷，我喺韋斯咸有過一段難忘嘅經歷。我非常多謝韋斯咸給予我嘅一切，我永遠係『槌仔幫』嘅頭號粉絲！」唔少韋斯咸球迷都特登喺周三入場，支持當年嘅護級英雄，佢哋仲帶埋泰仔啲海報入場，爭住同佢影相。不過，呢場泰仔冇正選，62分鐘後備入替，獲全場掌聲，上陣後有次頭槌攻門，但被對手撲出。
做後備風頭勁過美斯
泰仔話唔定係呢場最受入場球迷歡迎嘅球員，但貢獻最大嘅都係美斯。阿根廷喺11分鐘先失波，但美斯喺49分鐘送出助攻，安沙迪遠射省到阿古路入網，追成1:1平手。57分鐘，美斯塞個靚直線畀阿古路入楔，後者被攔跌，阿根廷獲得12碼，美斯操刀射入，協助球隊超前2:1。美斯之後仲有次黃金機會，但射中柱彈出，呢球亦係佢近3場比賽第5次中柱，呢排美斯真係做咗「柱」男！喺新帥馬天奴帶領下，美斯呢場轉踢邊路，佢話要啲時間適應，「我都好熟呢個位，但始終有好長時間冇踢過翼鋒。」
識睇，一定係睇足英台【英波Live】：
http://soccer.appledaily.com
http://bit.ly/engballlive