陳淑蘭喺今年年中自爆打肉毒桿菌毒素差啲冇命，事後佢去咗報警兼透過律師索償，希望攞返公道，噚日蘭子喺灣仔出席一個美容活動，佢話：「呢排有幾單美容失誤死咗人，但係都冇乜人跟進，我嗰件事發生咗之後，嗰個無賴仲繼續醫人，其實我已經認咗人，可能呢段時間警察忙啲，所以暫時停咗。」佢仲話：「嗰陣我好似漸凍人又吞唔到口水，試過同朋友食飯，都差啲窒息，講嘢又𧄌脷，塊面又紅，直頭呼吸唔到，我之前都做咗好多年美容嘅嘢，但係今次真係老貓燒鬚，英名盡喪，我𠵱家出錢搵律師，唔想嗰個人逍遙法外，但我知道有難度。」
利嘉兒：壓力大
早前自揭俾男高層威逼去飯局嘅利嘉兒亦同場出席，有報道話佢曾經有自殺念頭，佢話：「我只係想話畀人聽點解咁耐冇出嚟，想自殺只係因為做呢行壓力好大，加上自己成日諗埋一邊，所以咪諗唔通，同嗰件事無關。」佢仲話：「慶幸自己係一個理性嘅人，只係諗過冇行動，加上我怕影響屋企人，所以冇做到啲咁唔負責任嘅行為！」
撰文：馮仁昭
【三個粉絲去首爾】
追星實錄，即上韓劇讀： http://hk.apple.appledaily.com/kstar