雖然只係過咗11輪賽事，車路士仍然保持不敗，而且係暫時英超攻擊力最強嘅球隊，已經入咗28球，作客入球能力更比主場強，已經攻入咗15球。我記得今季開鑼前，曾經估車仔會贏冠軍，而曼城就會拎第2，𠵱家過咗三分一個球季，我對我嘅預測仍然好有信心。唯一難以估計嘅，係修咸頓會唔會保持到強勁表現。
2011年仲喺英甲作賽嘅修咸頓，喺冇任何大手買人同油王無限銀彈支持下，竟然可以重返英超作賽，上季仲打到第8位！當雲高爾不停話曼聯需要時間磨合，季前練習不足時，修咸頓開季連練波都唔夠人數。正當大家都諗住球隊今季一定降班時，佢哋今年就打到識飛，攻守都好出色。特別係主場，暫時只係失過1球，而且總計都只係失5球咁大把， 要知道第2失球少嘅車仔，都已經失咗11球，但修咸頓絕非放大巴之輩，入球數字更係英超暫時第2位。比起有朗尼、尹佩斯、 迪馬利亞等領軍嘅曼聯，都多入6球。
足球就係咁神奇，雖然我估就估車仔今年會贏英超，但如果修咸頓繼續神奇，仲有邊個敢否定佢哋？我相信唔少球迷同我一樣，鍾意睇足球嘅原因，係因為往往意想不到！
今個星期冇英超，焦點轉為國家隊賽事。英格蘭少有喺國際賽錄4連勝，加上冇失球，表現出少有嘅穩定，今場更係朗尼（圖）第100場國家隊賽事，相信會踢得更落力。斯洛文尼亞雖然近兩場都勝出，但實力始終同英軍有距離，相信難威脅主隊，英格蘭贏多於1球應該冇難度！
LULU
不懂踢波愛睇波