扶貧委員會下月換屆，主席林鄭月娥早前同委員聚餐時話，如果冇人退出就繼續做落去，所以新一屆好大機會原班人馬上任。部份委員近日陸續收到通知，張國柱、田北辰、馮檢基、何喜華同余志穩等人都獲續任；但有啲增補委員好似黃洪咁，就未收到通知，佢話如果政府邀請，就會考慮。
新一屆扶委會任期至2017年6月30日，同現屆政府看齊。6個專責小組會整合成4個，包括關愛基金、特別需要社群、社會創新及創業發展基金同青年人上游專責小組。張國柱希望新一屆可以將多啲措施常規化，如長者牙科等；何喜華就話要關注經濟同房屋問題，但主打都係退休保障。八方亦聽聞，推遲近兩個月嘅扶貧高峯會，下月有機會舉行，但要視乎佔中清場進度。