外省商人A搵完左丁山講佔中之後，又搵老友財務B問吓佔中個零月之後，樓價股價如何，財務B長袖善舞，多年來每有餘錢、分完花紅就去買樓，交完首期就出租俾外籍員工（expats），積積埋埋，在港島中上環灣仔已有十幾個單位收租，前年趁高出售賣出三層「優質樓」，賺到笑，足夠佢還清所有按揭債務，印印腳長嘆，呢輪成日去做「無糧義工」，回饋社會喎。
財務B對商人A講：「佔中對樓價全無影響，樓價繼續上升，一手樓成交暢旺到極，睇吓九肚山嗰個新盤加價加推就知。嗱，股市又升番啦，有大教授話佔中令香港股市損失三千幾億，係講大咗啫，股市波動無常，用股市嚟估計佔中後果，好易估錯。」左丁山唔抵得，問財務B有冇買九肚山新盤玖瓏山作投資用途？財務B話：「未有買，暫時睇唔通啲交通配套，未開賣前，我揸車上去睇過，玖瓏山不是位於大家熟悉嘅九肚山（舊九肚），而係要在麗坪道、大埔道交界迴旋處直上嘅新九肚，揸車上去要行幾分鐘，現時冇綠色小巴線，行路上落會好索氣，道路唔闊，將來未必有巴士，玖瓏山有973伙，只得550個車位左右，聽經紀講要大單位先至有可能配到車位，車位將來一定供不應求，會炒得好貴，我租樓多數租俾西人嘅，嗰度唔係幾啱我！」租俾中大有錢大陸學生得唔得，啲大陸研究生或者有錢俾得起租呢？財務B話：「佢地點返學呀，日日行路當運動呀？唔係好實際，要住新九肚，無汽車不行，無車位不行。」唔，將來實有綠色小巴開闢呢條搵米路綫嘅，不過或者晨早搭車要排長龍啫。
商人A問番財務B點睇佔中，原來財務B在金鐘出沒咗一輪，又到旺角消磨過一個周末，同啲年輕人傾咗一排，佢話依佢所見所聞，年輕人除要求真普選之外，還要求居住權利（人人有樓住），希望有「上流」機會，目前恐懼受困於月收14K或以下，前途似咁，更為外來大學生嘅競爭力大，搶去不少中環高薪職位，令佢地有壓迫感，害怕競爭，傾向北歐式社會保障制度。但香港係資本主義社會，素來係競爭第一，有能者居之嘅噃，香港好唔好放棄「資本主義」，改行北歐式高稅，政府照顧一切嘅政策呀？財務B話啲大學生仲未諗得清楚，思想矇矓，梁錦松建議成立高層次青年事務委員會研究青年政策關心青年，財務B話祝阿松好運！