光棍節拉埋天窗，黎諾懿一夜間突變「5億駙馬」。結婚當晚被問到婚戒有幾多卡，富二代老婆李潔瑩(Nicole)就答：「唔好咁現實，其實幾多卡都係無價。」對，愛情是無價，但外父就有嘢Say。有報道就話，婚後黎氏夫婦繼續住喺黎諾懿西貢租嘅700呎村屋連天台。坐擁5億身家嘅外父知道後，就有提議得閒可以過娘家住。話說，娘家位於君頤鋒，嗰度啲單位閒閒地成千呎，聽落真係住得舒服過舊村屋嘅。不過有指黎諾懿家陣因為方便返工，加上Nicole亦住慣咗，所以暫時都唔會搬。
其實黎諾懿都有嘗試過拉近同老婆娘家財力嘅距離，報道話佢曾經講過喺元朗買咗一塊地，打算起獨立屋做愛巢…不過一年過後，愛巢冇，就算黎諾懿名下一間物業都冇呀。另外，有指含住金鎖匙出世嘅Nicole做女時米都唔使洗粒，但拍拖之後，成日去西貢村屋瞓，又煮飯、又洗碗、又倒垃圾，為人父母點會唔心痛？！所以外父咪開到聲想佢兩個返娘家住囉，仲話頂多收黎諾懿租。之但係堅持婚禮費用一力承擔嘅黎諾懿，估計唔會應承囉。