【銅鑼灣】現年29歲嘅前香港先生黃長發最為人熟悉，當然唔係佢喺娛樂圈有乜嘢代表作劇集或者電影，而係佢同鞋王鄧劍群三奶李姿霆（Karen）搭上嘅新聞，之後仲搞到鞋王同三奶Karen對簿公堂爭樓。就算之後黃長發再冇同三奶Karen一齊，佢嘅夜生活都仲好多姿多采經常出動獵艷，仲俾本報影到佢喺夜店同低胸艷女下半身緊貼又扭又磨，好似都幾放蕩。
不過隨住年紀長大同09年離開娛樂圈之後，黃長發考咗個會計師牌，仲轉行做埋專業人士，過住啲朝9晚5嘅辦公室生活，之後就開始修心養性，更加絕迹夜蒲，上月底更加向外籍女友求婚成功。
保持fit爆身形
日前呢位過氣浪子戴住cap帽同未婚妻一齊現身銅鑼灣，黃長發嘅身形依然保持得好好。大概4點零鐘兩個人喺街行咗一陣，發覺老銅依然熙來攘往，冇受佔領事件影響。之後佢哋手拖手移師去咗時代廣場嘅Armani Exchange專攻女裝皮具銀包，黃長發陪未婚妻揀銀包嗰時，仲不停好似蜜蜂圍住啲蜜糖咁轉，鬼死咁癡纏，兩人前後研究咗4、5款細銀包，最後揀咗一款長銀包。跟住轉咗去睇男裝，試咗幾套衫都唔合心意，其間兩個人有講有笑不知幾甜蜜。
採訪、攝影：徐錦池
【三個粉絲去首爾】
追星實錄，即上韓劇讀： http://hk.apple.appledaily.com/kstar