先係滬港通，再來撤銷人民幣每日兌換上限，睇落阿爺似係認真mode，畀甜頭香港（說好的懲罰呢）。不過，開通後稅制係點，至截稿前都未公佈，所以大家唔好開心得咁早。
之前都講過，滬港通最大受惠者係想運錢走嘅內地人。本來殼股鑊氣已好大，加埋滬港通吹一吹，殼價就更高。同財圈人傾開，大家都話創板殼極搶手。而家主板殼價5億元左右，以往創板殼都係半價。但滬港通下，內地資金心急想搬錢落香港，令創板殼更渴市，底價由6月時2億元，升到而家2.7億元，相信未來殼股交易越來越多。
今次就推隻殼股，市值5億元左右嘅奕達（2662），噚日彈高近8%。呢間公司近呢幾年其實好坎坷，2011年10月泰國水災搞到停產，之後就開始蝕錢。去到今年5月，越南廠又因為暴亂而停工。至今年6月底全年，勁蝕2.7億元。我係老闆都做到心灰意冷啦。
奕達為電子製造服務供應商，業務簡單，本身已符合靚殼條件。睇埋資產負債表，你就會見到驚喜。至今年6月底，現金2.5億元，無長債，可以話係非常之咁乾淨。淨係殼價都已值5億元，加埋現兜兜嘅cash，屈指一算，即係間公司最少值7.5億元。
篤下計數機，每股最少值0.77元，就算呢幾日升咗咁多，潛在升幅仍有37%！
Fifi
http://www.facebook.com/lovefrystock
本欄逢周二、四刊出