如果你問我求大俠幫美斯起個乜嘢花名，我求大俠會答係「張家輝」，因為佢哋真係好似樣。但基斯坦奴朗拿度（C朗）就唔係咁樣形容美斯，反而俾個西班牙資深記者爆佢用性器官加人哋阿媽嚟稱呼美斯，簡單嚟講即係粗口。至於係乜？咪係「XX媽」囉。
澄清兼法律追究
有個叫巴拉格（Guillem Balague）嘅西班牙資深體育記者兼球評家日前出咗本叫《MESSI》嘅書，大爆C朗喺佢班皇家馬德里隊友面前，開口埋口都叫美斯做「motherf*****」（XX媽）。
報道出街之後，C朗即刻喺佢嘅Facebook上澄清：「有人話我用啲好冒犯嘅字眼嚟稱呼美斯，但絕對冇咁嘅事。我已通知咗律師，會向有關人士採取法律行動，要佢為自己嘅言論負上全部責任。我非常尊重所有行家，美斯當然亦唔例外。」C朗有冇用粗口嚟稱呼美斯，真係天知地知同佢自己知，不過巴拉格堅持呢位29歲葡萄牙球星真係有咁講過。
記者疑似親巴塞
巴拉格喺書中提及C朗同美斯嘅關係，話佢哋為咗國家隊、球會同埋自己利益，鏡頭面前互相尊重，但喺鏡頭背後其實一啲都唔friend關係亦麻麻；而佢仲表示，C朗會用「XX媽」嚟稱呼美斯。佢話C朗咁做，係要話畀班皇馬隊友知，一啲都唔驚呢個效力巴塞隆拿嘅27歲阿根廷球星。佢話：「皇馬班球員話C朗幫美斯起咗個花名叫『XX媽』，佢一聽到球會內有人講美斯，就會即刻話嗰個『XX媽』。」
查實私底下同西班牙名帥賓尼迪斯好老友嘅巴拉格，除咗有喺西班牙報紙《阿斯報》寫嘢同埋喺西班牙國家電台CADENA SE做節目之外，仲有喺Sky Sports主持一個西甲節目，而且一做就做咗16年咁多，所以係西班牙球壇其中一名最可靠同最有料嘅記者。
之不過，巴拉格之前幫前巴塞隆拿教練哥迪奧拿寫咗本叫《Pep Guardiola：Another Way of Winning》嘅自傳，又喺舊年公開表示美斯係足球史上最出色嘅球員，令人懷疑佢係同巴塞有啲關係囉，難怪有人認為佢根本係老作屈C朗啦。
識睇，一定係睇足英台【英波Live】：
http://soccer.appledaily.com
http://bit.ly/engballlive