每次《變形金剛》一出，不論電影上畫定係影碟推出，各大公司重頭戲全都退避三舍。無計，靚車多、動作多，最重要係fans多。好似第四集《殲滅世紀》出藍光碟，杜比就最新拿拿聲即刻畀全球首配全景聲系統Atmos佢，聽旺角專賣高級音響嘅肥仔昌講，好多老顧客專登set好套Atmos，就係為等《變4》隻BD。在DVD年代屈咗咁耐，Dolby終於帶起個熱潮，剃番DTS眼眉一次。
講番《變4》，劇情好似離唔開公式化，同《X-men》系列一樣，明明係救人類於水深火熱嘅正派角色，偏偏大戰過後總被人唾棄，跟手又有強敵出現，人類抱頭亂竄，外星朋友又不計前嫌咁出手幫忙，每一集都係咁無限loop落去，學阿寶話齋：「人類總要重複同樣的錯誤。」當然，睇得呢類特技動作大片，都唔望劇情有乜深度，不過龍叔叔鍾意「老變」，都係貪佢多到暈嘅靚車，一隻隻變嚟變去，加上CG動畫已進入真假難分嘅境界，真係迷倒一眾大小男孩㗎。
IMAX搭Atmos 震撼無比
講開靚車，雖然今集又係雪佛蘭最多車款出場，由大黃蜂Camaro跑車、揭背小車到SUV都識得變形，仲有新款林寶堅尼同Pagani嘅Huayra等超跑撐場，最好笑係上集出現過嘅法國千匹超跑Bugatti Veyron，製片話因為車廠賣咗部車，所以角色焗住由橙黑色變成今集另一架嘅藍黑色喎，證明Veyron又真係限量出品，連「老變」都冇面畀。
新一集《X-men》有范冰冰，「老變」都唔弱，搵咗佢宿敵李冰冰，而且造型無咁鬼五馬六，戲份多過范爺幾倍，中國戲迷實buy。但對港人嚟講，最親切莫過於到香港取景，灣仔會展、上海街舊區等，睇住一堆機械人喺街道上飛嚟飛去，都咪話唔過癮。
難得一套超大作，碟商梗會有咁大搞咁大，《變4》幾乎乜配搭都出一個版本，單碟、孖碟、2D、3D、HMV別注版、鐵盒版等，最搶手當然係柯柏文騎龍figure套裝，標價$1,600，一早被搶購一空，「DVD Pro」Andy話最勁炒過$3,000！好彩龍叔叔唔好呢啲周邊產品，求其一隻3D版已經好滿足。查實今次3D版要畀10個like佢，事關喺聲畫上差不多係最高規格（唔計4K版），跟番戲院咁插播大量IMAX畫面，通常喺機械人close up、大混戰大爆炸時，畫面就會變成接近IMAX嘅full screen，畫面又大又sharp，睇得格外地high。聲音更係收錄咗Atmos 7.1.4全景聲音軌，龍叔叔喺肥仔昌度聽咗一陣，額外增加嘅四個喇叭，真係聽到柯柏文喺頭頂飛過，震撼感無與倫比。就算龍叔叔屋企仍只係7.1系統，都表現到好清晰嘅定位，加重咗嘅低音，亦令到炮彈聲、撞擊聲充滿力量感。
3D雙碟版，並不包含2D版，另一隻係Bonus BD，收錄內容可想而知有幾豐富。最好睇當然係making of，睇吓香港街景點樣搭巨型綠幕key CG畫面、香港人點樣八卦望住人拍戲、一堆靚車喺上海街片嚟片去等。龍叔叔最欣賞係全碟均收錄10大語言字幕，不知不覺居然睇完成隻bonus。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
