香港拳壇「神奇小子」曹星如，唔經唔覺轉做職業拳手已經有3年零3個月，難得打咗14場仲保持不敗身，原來背後有位胡女醫師做佢秘密武器。星如呢兩年逢親賽前賽後一定去幫襯，解決長期腳踭痛兼足底筋膜炎嘅職業病。
改善訓練質素唔怕痛
「喺轉做職業拳手嘅第2年，我試過行路腳踭位都會痛，痛到好似有把刀劈落嚟，有時痛一吓無事，嚴重時係間歇性咁痛；最重要係我嘅拳擊訓練全部都要跳躍，打拳要跳、跑步要跳，腳痛好影響我嘅訓練質素。」訪問當日，星如出發去菲律賓備戰本月23日喺澳門威尼斯人上演嘅「金光決戰2」，力爭擊敗印尼嘅艾賓奴沙保贏得職業生涯第15連勝，所以呢日又上去中醫師診所「保養」雙腳啦。
胡醫師其實係星如女友阿嵐嘅家姐，佢亦因為幫星如手而多咗留意拳擊比賽；星如就話最怕刮痧，每次要成30至40分鐘痛到喊，𠵱家雖然好得七七八八，但每逢大賽前後都要去醫師度「保養」，確保啲筋膜唔會再繃緊，令職業生涯更長久。
𠵱家仲喺菲律賓嘅星如噚日接受長途電話訪問，話即使繼今年5月試過換對手之後，嚟緊呢場8回合超蠅量級比賽嘅對手又改過，都無損爭取15連勝嘅決心：「比起之前一次，今次又換對手已經冇乜感覺，都會視對手為強敵；呢個印尼拳手好多時會打到最後1個回合，所以我預咗打晒8回合嘅體能，希望以密集拳取勝。」
識睇，一定係睇足英台【英波Live】：
http://soccer.appledaily.com
http://bit.ly/engballlive