Prof J一身好本領！最主要係因為以前做嘅節目，都係以分析上市公司公告為主要，當然10隻有9隻都係「插佢」（即係監製想咁樣），但係如果插完佢股價升，咁咪即係Prof J嘅分析有問題，所以最後決定將認識嘅心法變咗一種分析嘅思考方法，亦都係後期Prof J日講夜講嘅蜻蜓投資法，就係咁解！
完美睇好倉位誕生
近排MI能源（1555）正正符合蜻蜓投資法，啱啱出嘅公告，講咗股權有變動，即係財技啦，再加上一籮籮認購同認沽權證嘅協議，肯定搞到大家頭都大埋！呢個合同有雙方，F&C，F係班高管嘅公司，C就係MI嘅旗下公司，F賣咗個認沽期權畀C，同時間C又賣咗個認購期權畀佢，行使價係一樣但加咗個時間因素喺度頂住，因為大家食開即食麵，所以F班股東透過呢個「變型金剛」式嘅組合就等於開咗個長倉，即係睇好啦。
相反，C就成為咗一個短倉，你而家又會問我C無理由睇住公司股價下跌，其實我覺得C只係一間為咗完成呢間公司嘅偉大超級英雄，令到一班高管可以為自己製造咗一個完美無暇嘅睇好倉位，確係無得頂！
最緊要係F同C已經似歌神首歌一樣——同舟共濟，股價跌，C有認沽揸手，同時間畀F可以有一個努力工作認購權證！真係小啲料都解唔到，跟住點，咪繼續睇我專欄追蹤我嘅報道。
徐燦傑
齊魯國際控股首席策略總監
本欄逢周四刊出