民建聯Tree根日前喺工務小組上大大聲讀出白紙黑字嘅會議程序條文後，仍然覺得小組主席梁家傑有酌情權，可以畀後補申請嘅建制派加入小組，令大家更着意啲條文係咪一如Tree根所言？都係立法會秘書處夠體貼，適時推出更新版嘅立法會智能電話流動程式，當中嘅電子書功能，好適合Tree根用。
原來新版本嘅程式內，設有電子書版本嘅議事規則、內務守則，仲有財委會、人事編制同埋工務兩個小組嘅會議程序，唔使上網都睇得到，好啱Tree根坐車、瞓覺前或者去廁所時溫吓書。除咗電子書，用新程式睇立法會直播，同埋開心些牙有關立法會嘅資訊都會方便咗，大家不妨試吓。