冠軍騎師潘頓功架十足，而苗禮德馬房就惡馬如雲，本來應該一拍即合，但上季初潘頓主動宣佈放棄苗廐馬王「雄心威龍」嘅帥權，激嬲咗練馬師，結果好有性格嘅老苗，話知你潘頓好有份量，照樣將佢放入大雪櫃，足足雪咗一年硬過石頭。直到上月中旬，莫雷拉停賽，老苗唔想灰色神獸「和順超影」隨便畀其他人騎，於是將潘頓初步解凍，客串騎神獸，結果人馬都冇令人失望，以驚人姿態勝出漂亮一仗。
可惜吖，「和順超影」已經重交雷神操練，嗰次之後老苗亦無其他馬畀潘頓騎。不過潘頓畢竟騎功超卓，老苗梗有用得着佢嘅地方，本周六兩人將作季內第二次合作，就係出爭一班1400米樂聲盃嘅「好健康」嘞，呢匹馬嘅1400米實力真係唔使懷疑，11戰此程得6冠2亞，勝出率極高，上季贏三級賽港澳盃一啲都唔吃力；而上仗慶典盃更只輸畀全港最佳一哩馬「大運財」，本身已跑贏馬王「威爾頓」得第二，今次「好健康」爭普通一班賽，對手級數低過「大運財」好多，潘頓、老苗呢Pair睇嚟可以保持今季合作不敗嘅佳績。