台灣今個月底舉行「九合一選舉」，唔少政界中人都買定飛機票，準備飛過去觀戰，順道為2015年區議會同2016年立法會選舉吸收吓經驗。但喺訪台氣氛沸沸揚揚之際，新民黨主席葉劉淑儀卻好冷淡，無意去台灣取經，莫非佢自覺選舉戰術已經超晒班？八方探聽下先發現，葉劉因為捍衞佢嘅body，決定唔去台灣happy！
八方相信唔少港人一年去幾次台灣，吃喝散心兼玩樂，但原來葉劉成世人，都未去過台灣㗎，喺香港簡直係異類。因為乜嘢原因而拒遊台灣呢？原來佢怕被特工睇全相。葉劉解釋，港英年代出任工業署署長期間，港英政府嘅政治顧問因為「一國」原則，反對官員去台灣，所以佢一直冇訪台：回歸後，佢出任紀律部門，其後做埋保安局局長，相信好難入境，所以繼續冇踏足台灣。
驚有針孔攝錄機
咁𠵱家只係行政兼立法會議員，身份冇咁敏感，應該可以去大玩一番啩？點知葉劉話喎，因為聽聞台灣嘅特工好犀利，最驚俾人用針孔攝錄機影到佢沖涼，為咗保護全相，必須要搵到個安全啲嘅方法，搞掂住宿問題免被偷影先至會去，例如選擇即日來回啦、又或者去私人朋友屋企住。八方唔知佢呢番「抹黑」台灣特工品味嘅言論，會唔會反而令佢被列入黑名單？但唔排除佢其實係想曲線幫當地碌柚葉商販，刺激銷量囉！
李八方
mailto:[email protected]