立法會議員田北俊，由於曾公開呼籲梁振英考慮落台以息民憤，搞到自己畀阿爺搣柴，冇得再做全國政協委員，佢自己仲辭任埋自由黨黨魁。無官一身輕，田少話日後可以多啲時間湊孫同去旅行，享受人生。養馬多年嘅佢，呢晚囡囡田啟安同夫婿鄭宇隻愛駒「盈威勇士」出賽，田少雖冇入場，但呢匹摩廐馬冇令田家失望，除眼罩、加頭罩兼落班跑，順利由雷神後上勝出第四場四班一哩賽事，六歲馬打破上季至今頭馬荒，亦成為呢晚頭四場中，第三匹建功之1號馬，之前兩匹係「一團威」、「聖驛善」。
今場三T頭關跑第二係另一隻後上馬「大家贏」，第三名則由落飛馬「足智多謀」攞到。賽後大摩指「盈威勇士」降入四班有利，由於之前跑來搶囗，因此加了頭罩穩定走勢，令牠可以留力，擺在稍後位置，末段得以交出強勁衝刺勝出。