47歲老將巫斯義近排喜樂參半，喜者對上兩戰佢都中三元，悲者剛周日賽事佢策「幸運新寶」犯規，連同之前亦衰過，稍後共要停賽六個賽日。為咗補償損失，阿巫呢晚繼續殺馬，第三場四班1000米騎大熱門「聖驛善」後上一攻而破，幫此駒敲響今季勝鼓，馬主許晉義乃李嘉欣丈夫許晉亨堂兄，許晉義剛於三日前與阿巫合作贏「特務飛龍」，呢晚佢扮靚穿住唐裝衫拉頭馬，非常風騷，更大讚巫斯義騎功了得。
「聖驛善」同時係吳定強同阿巫繼1994年2月「藍爵爺」後，近20年來首度合作贏馬，幾有歷史意義。「聖驛善」上季九月尾贏四班谷草一千米開齋，之後一直贏唔番，上鋪開始搵阿巫幫手，點知姍姍來遲輸咗畀「四喜滿堂」，今勻再用呢個配搭，班次同路程都冇變，但排檔大幅內移至一檔。結果馬有馬性，「聖驛善」早段留住跑，直路抄出外叠一衝過晒，六歲馬累積四戰谷草A欄最短途1000米，豪奪兩冠兩亞全入Q；吳定強打破咗一個月齋缽，至於跑第二、三分別係「海紅寶」及「金紫荊」。強哥指今場早段步速快，又有好檔幫助，形勢對「聖驛善」有利，而馬兒在四班亦始終有著數。