做人難，「造人」也難。
人妻梁詠琪（GiGi）2011年嫁了西班牙籍丈夫Sergio後，經過2年半的努力終於成功造人，現已懷孕5個多月，GiGi已知腹中BB是女兒，雖已腹大便便仍然坐唔定，繼續工作，秉承港人拼搏精神。
GiGi現經歷體內荷爾蒙的突變，身形日漸膨脹起來，隱藏的母性也突然湧出來，混血B女將於明年2月出世，GiGi已跟丈夫計劃要再接再厲，要生夠3個先收工，誓要組織幸福滿瀉的大家庭。
統籌：林妙萍
採訪：顏英儀
造型：趙潔恆
攝影：郭賢興
髮型：Ziv.Y of pi4.com.hk
化妝：Andy Leung of ndnco.co
還記得大半年前梁詠琪（GiGi)接受本報訪問時坦言恨生B，結婚兩年多仍未有好消息，皇天不負有心人，今年5月GiGi跟老公到美國放浪漫長假，在無壓力的情況下終於成功造人，日前跟這位準媽媽訪問，見得最多是她發自內心的幸福笑容，陀B五個多月的GiGi已知腹中BB是女兒，「BB係上天畀我一份最大嘅禮物，生B無得強求，幸好之前我哋一直努力冇放棄到，BB出世健康就已經好滿足，不過我同先生目標唔止生一個，因為我哋都有兄弟姊妹，想組織大家庭，趁身體仲OK希望生多個，好命嘅話想生三個。」
計劃三語教育
38歲的GiGi第一次做媽咪變身緊張大師，現凡事都以小朋友為先，B女未出世開始已為她鋪路，「都係時候修心養性做媽咪，首先唔會買咁多衫，購物慾減少，𠵱家會諗長遠啲，將來BB嘅衣食住行花費都要有長遠計劃，唔再亂咁買嘢。」GiGi已計劃B女出世後餵人奶，故沒有奶粉問題，至於教育GiGi即「港媽」上身說：「好彩BB唔喺龍年出世咋，如果唔係就要爭學位，我已經開始做research，向身邊媽咪朋友請教，先知道出世半年未戒奶就要開始搵幼稚園，開始覺得啲責任湧埋嚟。我先生都唔係好了解香港嘅教育情況，佢就好輕鬆，至於語言方面都已經諗定，將來BB同爹哋就講西班牙話，我喺度就講英文，淨係我同BB就講中文，實行三語制。」
等接大肚角色
雖然GiGi已腹大便便，但仍工作不絕，拍廣告、做訪問，還未放低手頭上的工作，而且還犯禁着高踭鞋開工，「每個工作我都會同老公解釋清楚，相比拍戲喺影樓影相就輕鬆得多，其實我都想拍戲，唔介意做大肚角色，但始終係我哋第一個小朋友都會緊張，凡事都會以BB優先，雖然有好嘅角色，等將來有先至把握，𠵱家一有時間都會盡量留喺屋企休息或者做孕婦瑜伽當運動。」
懷孕期間GiGi口味亦改變不少，從不愛喝朱古力奶，現在天天都要飲過才安樂，愛妻號的Sergio為太太落廚炮製愛心三文魚餐補充Omega 3，可惜GiGi一聞到魚腥味就即刻作嘔，浪費了老公的一番心機，幸好GiGi的媽咪天天為愛女準備靚湯補身養胎。
GiGi身形一向偏瘦，懷孕後身形起了很大變化，體重直線上升，「咁大個女都未試過咁肥，𠵱家要接受自己水桶腰又肥嘅身形，已經肥咗近20磅，做演員控制體重有壓力，𠵱家可以拋開壓力，用另一個角度欣賞自己嘅變化，最想生完之後快啲修身，因為我生得高，如果肥就會變大山婆，好羨慕楊冪同埋陳慧琳生完之後都可以咁弗。」
以香港為家
佔中已經超過一個月，上月初剛與丈夫度過結婚3周年，撞正佔中因而留在家中與丈夫度過二人世界。談到佔中，將為人母的GiGi可會擔心下一代的未來？「都未知結果會係點，做父母當然會擔心子女嘅將來，想喺一個穩定舒適環境下長大，不過最緊要有信心，一個人只要心胸豁達，喺乜環境長大都可做一個開心快樂嘅人，其實香港係一個福地，日後都會以香港為家，除非將來老公掛住佢西班牙嘅屋企人，到時先會考慮搬去西班牙住。」
更多精采時尚內容，盡在 http://hk.add.nextmedia.com/