新界一間中學認真唔話得，老師出錢、學生出力，設計兼印製咗5,000個塑膠file。嚟自嗰間學校嘅李同學前晚喺佔旺區幫手派file，佢話同學以公投形式，一人一票喺10款設計式樣中揀咗四款印製，免費派畀市民同校內同學。
黃傘配海闊天空 市民like爆
呢四款file，包括黃傘配以海闊天空歌詞，好易引起港人共鳴；另一款係民主會戰勝歸來，好潮地配上撐起雨傘歌詞。9.28勿忘初衷、愛與和平嘅file，亦好多市民like爆。但八方最鍾意嘅，就係反映記者採訪辛酸史嗰款，事關喺記者記錄香港民主發展史上重要時刻時，一班藍絲卻成日去佔領區搞搞震，兇人甚至打記者。而呢款封面畫咗記者採訪攞住刀同榴槤嘅反佔中人士，背面寫住「無畏無懼」嘅file，點會唔得八方歡心？八方同事日前喺佔鐘區打稿時，更獲自稱係設計者嘅中六女同學送贈此file，佢叫八方同其他記者加油。