提起法國，好多人都會諗起紅酒同LV等名牌，查實法國科技發展都唔弱，唔少仲融入咗香港人生活中。
法國領事館、法國對外貿易顧問同埋法中委員會為咗推廣法國高科技嘅技術、交通運輸等，喺中環街市嘅綠洲藝廊，由即日起至本月16號舉行「非常法國‧非凡創新」展覽。
透過影片、動畫同展板等，介紹香港人成日用嘅回鄉卡，防偽特徵原來係出自法國一間專門提供保安技術嘅公司，負責人話有咗呢啲技術，犯罪分子好難冒認，又話曾經同特區政府傾過，睇吓將來特區護照會唔會用佢哋公司嘅保安技術。
佔中遍地開花，有反佔中人士話嚇怕外國公司嚟香港投資、做生意。法國駐港澳總領事栢雅樂喺展覽中話，舊年有約750間法國公司進駐香港，今年應該有成800間，又大讚香港係最安全嘅城市，又同內地好近，呢啲優勢唔會受影響，即係佔中冇令法國公司卻步啦。