董建華日前成立「團結香港基金會」，非常隆重地廣邀自己以往嘅政壇好友出席，所以出席得嘅人，都係阿董心中「信靠得住」嘅好友。政界、商界多位大粒佬出席唔出奇，但八方嗰日都見到三位傳媒高層現身，唔知大家估唔估邊幾位獲老董「睇重」？
第一位，係女士，相信好多人都會估到，就係商台新聞及公共事務總監陳淑薇，傳媒界都知佢同老董相當熟絡，以往阿董做特首時，都會去May姐嘅節目接受專訪㗎。另一位，又係女士喎，就係《南華早報》副總編輯譚衛兒，跑開中國新聞嘅佢，同政協副主席老友鬼鬼絕不出奇。最後登場嘅亦係女性，就係《信報》總編輯郭艷明，究竟郭小姐嘅現身，係因為佢同阿董嘅關係，定係因為《信報》大老闆李澤楷呢？八方就唔知嘞！