海迪向來不喜歡關連交易。試想想：大股東認為不應該再持有某項資產，是時機出售套現；但他控制的另一間上市公司，卻認為是時候購入同一筆資產。試問一個人點解會有兩份如此截然不同的心思？或者理文造紙（2314）可以回答一下。
理文是本港老牌造紙企業，曾因擴張過度，在金融海嘯時面臨沒頂危機。公司自此專心經營本業，不失為近年難得一見的殷實工業股。比起同業玖紙（2689），投資界更偏愛理文，因理文管理層「有嗰句、講嗰句」，在行內有credibility。所以，當理文前日「無啦啦」宣佈用4億元，向大股東購入廁紙業務時，海迪頭頂真係冒出了很多問號。
呢間廁紙公司是新開張，今年第三季才正式投產，此前沒有任何收入的track record。廁紙雖然都係紙，但唔代表兩項業務就一定有協同效益。理文傳統經營的包裝紙生意，是賣畀企業客戶。但搞廁紙，如長遠想做品牌，是要直接賣落超市、商店等零售終端。開拓銷售渠道、經營品牌等專業範疇，都非理文所擅長。
有分析員朋友說，內地紙巾行業每年仍有9%增長，但行業近年整體產能的增幅，卻是20%、30%，故睇紙巾股業績，topline通常唔係問題，margin要唔跌才是難搞。理文未來有需要向市場提供更多想法，以證明今次的投資方向是正確的。
海迪