近年韓風吹起，套套韓劇帶起咗唔少韓國化妝、護膚產品品牌。當地化妝品龍頭、市值逾950億元嘅AMOREPACIFIC集團，日前引入系內旗艦品牌、與集團同名嘅「AMOREPACIFIC」產品到香港。公司高層透露，呢隻產品未攻港之前，已經有唔少闊太、名媛幫襯，「10大富豪入面，幾位阿太都有用」，不過就唔肯開名講邊幾位。
呢個牌子有幾矜貴？全套共9款護膚套裝承惠約15,000元，閒閒哋一支50毫升嘅面霜，都賣緊三千幾蚊；不過，香港分公司董事總經理葉豐盈話，現有兩個品牌LANEIGE同雪花秀，今年香港銷情分別大升超過50%，遊客消費繼續增加，11月仲一炮過新開9間分店，「完全感受唔到市道差」，所以引入新品牌時機成熟喎。