「金牌莊家」詹培忠又沽走一隻殼股喇，今次呢隻係「股壇長毛」David Webb都持有、主要做汽車揚聲器嘅工業股成謙聲匯（2728）。
詹培忠舊年7月先至買入呢隻股，佢喺場外按每股0.6元買入9,000萬股，總共使咗5,400萬元，當時佢都講過，買入成謙只當投資，唔排除會沽番出去。佢說到做到，隔咗幾個月，就開始喺每股0.75元嘅水平減持約一半。
根據聯交所最新資料，詹培忠上星期再分開三日減持成謙，平均價介乎1.22至1.36元，合共沽走餘下4,030萬股，套現5,245萬元，計埋之前沽走嘅股份，詹培忠合共套現9,340萬，賬面升幅達73%，呢一筆明顯係好好嘅投資喇。
其實詹培忠講過，佢近期賣殼股多過買殼股，根據聯交所資料，佢現時仲持有一隻能源國際（353）約一成股份咋。