滬港通下星期一開車，各間證券行急不及待推出優惠搶客，遲啲可能連股評人都要搶喎。噚日香港分析師協會搞傳媒茶敍，副主席郭思治（郭Sir）認為，滬港通帶挈埋財經分析師做大個餅，預計2至3年後，將會有股評人挖角潮，因為內地股民需要了解多啲點玩港股。
身兼耀才證券（1428）市場總監嘅郭Sir話，公司現時不論香港定係內地分析員都請，最緊要夠勤力咁話。
協會永遠榮譽會長藺常念認為，新入行唔需要有特定背景或才能，「都係要邊學邊做囉！」佢仲話，一批新晉股評人當中，例如蘇沛豐、盧志威、陳鳳珠等等都做得幾好，可謂後起之秀！
藺Sir又提點，現時內地公司造假多，勸大家「太好嘅故事唔好信」，股評人更加要小心，因為世途險惡，周圍都係搵人笨嘅莊家。