一場梁粉鬥唐營嘅好戲，噚日喺廠商會上演。話說廠商會噚日改選新一屆會長，由第一副會長、屬唐營嘅全國政協常委陳永棋堂妹陳淑玲，惡鬥第二副會長、知名「梁粉」李秀恒。早前嘅會董選舉，李秀恒得票排16，陳淑玲只排89，似乎透露咗少少玄機，據知兩大陣營拉票拉到最後一分鐘，可見選情幾緊湊，結果喺阿爺挺梁等於挺自己嘅氣候下，連帶梁粉都有運行，李秀恒最終跑出，接任施榮懷喺明年1月1日正式做會長，任期三年。八方聽聞李、陳得票約六四開，相差十幾廿票。
邊個做會長直接影響下屆廠商會所屬嘅立法會工業界（第二）議席花落誰家。有傳施榮懷退任會長後，有望接替林大輝入立法會，唔知佢想唔想做疾風中勁草呢？