一班少男少女，噚日狂loop五月天嘅《我不願讓你一個人》，咩事首歌忽然爆紅？
原來又係「Alexter現象」作怪，事關學聯副秘書長男神岑敖暉Lester，噚日用上鄭子誠sexy聲線，喺電台點唱呢首歌畀包括周永康Alex在內嘅佔領戰友，表明唔會讓康康孤單上路。唔少人或者聞者心酸，呷醋未獲男神憑歌寄意，但更可能令聽者流淚，皆因呢對學界孖公仔互勉史，認真可歌可泣！
Alexter粉絲冧爆
Lester噚日其實係應商台節目《在晴朗的一天出發》嘅「特別的歌點給特別的人」環節，選歌贈友。結果佢揀咗台灣組合「五月天」歌曲《我不願讓你一個人》，送畀同佢如影隨形嘅Alex……同一班學聯戰友。
Lester冇講到，呢首係唔係佢嘅K場飲歌；至於點解點唱呢首歌？佢話佔領行動至今持續逾40日，知道大家喺呢條路上，都走得好辛苦，一如歌名，佢唔想有人獨自一個孤身上路，希望未來嘅日子，大家可以一齊打仗。
Alex上京陳情前夕，獲Lester點歌打氣，呢份溫馨支持，冧爆Alexter嘅粉絲，「我不願讓你一個人 一個人在人海浮沉 我不願你獨自走過 風雨的時份」，相信都係佢哋粉絲嘅心思。
而面對來自四方八面嘅抹黑，八方相信暉暉都唔會讓康康獨自一人，「承受這世界的殘忍」。
李八方
mailto:[email protected]