金衛醫療（801）啱冇耐公佈，以溢價配股增持祖國醫院權益，食住醫療市場勁厚潛力，加埋金衛上年又撇到乾乾淨淨，一turnaround，喺八年海底價，可以不得了。
金衛上星期五簽協議，增持GM hospital 17.4%，變為全資附屬，兼透過GM經營上海東方國際醫院（56%）同北京清河醫院（82.7%）。呢壇製作，部份以配股支付，配股價1.26元，比當日收市價1.24元，係有溢價。金衛家陣比起2007年高位9.57元，大插咗87%，得0.48倍PB，配股睇到，金衛冇價講，以溢價配股，股價殘冇可殘。
內地醫療市場商機大
再睇祖國醫療市場。面對住人口老化、都市病等等問題，Frost & Sullivan就估計，三年後的2017年，祖國病人就診總人次，去到128億人次，比起前年70.7億人，大增81%；而住院人次，亦會增加168%，到6.7億人。
至於祖國醫療總開支，亦會由2012年2.9萬億元人仔，升到後年5.6萬億元人仔，成幅picture好爆炸。金衛增持醫院業務權益，再食住睇得見嘅勁厚商機，肥仔。
金衛上年勁蝕4.3億元，但無形資產減值，都講緊上4.5億元，唔計呢個撇減，實際係賺8,650萬元。金衛今年冇撇減影響，加埋業務發力，當純利去番前年度1.4億元，預測PE得15倍。又集團明年純利再增長30%，預測PE再跌到得12倍。
場內講得出，有經營醫院瓣數嘅醫療股，金衛PE同PB都係平霸。當喺呢個海底價1.31元翻半番，去到1.96元計數，金衛PB都係得0.75倍，已經展翅，短短兩個月升咗40%、創埋新高嘅鳳凰醫療（1515），PB係講緊6倍！
錢雋
細價股專家
本欄逢周二、三、五刊出