好少停賽嘅冠軍騎師潘頓，呢兩期都要停賽唞吓啦。啱啱嗰次沙田賽事，「搖錢樹」、「星航渡」、「包裝鬥士」同「觀自在」對上一仗都係潘頓騎，結果全部換人贏晒。當然，其中部份馬匹因為輕磅關係，就算潘頓唔停賽，佢未必可以騎到，但眼見一隻又一隻咁益晒下家，都一定唔爽。
今期潘頓仍然要停賽齋睇馬，有冇馬上仗由佢騎而要換人跑呢？當然有，分別係第五場「惜福」同第六場「紅簿仔」，兩匹馬上仗都喺潘頓胯下搏輸咗。文廐「惜福」換巫斯義，近期佢同文家良合作可謂如魚得水，「惜福」送到埋口，老巫有食唔食罪大惡極，話唔定可以帶旺呢匹處女馬開糊。至於「紅簿仔」換何澤堯，呢位華將今季贏馬仲多過韋達，點敢睇小佢呀！