星期六英格蘭對斯洛文尼亞場波，將會係朗尼第100次為國披甲，就喺日前，佢決定抄兩位前隊長謝拉特同卜比摩亞嘅慶祝方法，返母校搵99個小朋友同佢影張大合照。
朗尼星期一返到家鄉利物浦市，探訪小學母校。99個師弟師妹着住主場或作客嘅英格蘭波衫，喺禮堂迎接朗尼。朗尼除咗同佢哋傾偈講笑之外，當然唔少得逐個簽名啦！一次簽99個名，我求大俠一諗起，隻手都覺得攰，但朗尼呢啲大球星，相信都簽到慣㗎嘞！至於重頭戲就係複製謝拉特同卜比摩亞嘅經典一幕，朗尼坐喺中間，同99個小朋友影大合照！不過，謝拉特同卜比摩亞嗰兩張合照入面，99個小朋友都戴住帽，代表住99頂「喼」帽，而朗尼嗰張嘅小朋友就冇戴帽，而係着住英格蘭波衫。
29歲嘅朗尼好享受同師弟師妹見面，希望可以鼓勵到佢哋勇敢追尋夢想，「返母校嘅感覺好特別。我見番幾個教過我嘅老師，同埋見到呢班師弟師妹，都令我好開心。當年我讀書嗰陣，夢想成為職業球員，最後我可以達成目標，做埋國家隊隊長，嚟緊仲會第100次上陣。當佢哋見到我以前同樣喺度讀書、大個又做到自己想做嘅嘢時，代表佢哋都做得到。我以前讀中學時，見過謝菲斯（前愛華頓及阿仙奴前鋒），嗰陣佢都畀到啟發我。」
連尼加讚史上最佳
呢幾日唔少英格蘭名宿都出嚟大讚朗尼，好似連尼加就話，朗尼係英格蘭史上其中一個最好嘅球員，「朗尼已經為國家隊射入43球，表現一直好穩定，佢好叻喺前場搵空位，亦擅於回後派牌組織，非常全能。不過，因為唔同原因，佢好少可以最佳狀態踢大賽決賽周，或者就係球隊整體表現唔爭氣。」
識睇，一定係睇足英台【英波Live】：
http://soccer.appledaily.com
http://bit.ly/engballlive