NBA總冠軍熱門騎士開季成績不似預期，但係由「大帝」勒邦占士、K艾榮同路夫組成嘅「3巨頭」夾咗幾場後，整體配合明顯好咗；周一就喺超過兩萬個球迷面前，合力攻入86分，帶領球隊以118:111小勝塘鵝，今季主場終於打開勝利之門。大帝今場亦造出個人今季第一次三雙，錦上添花。
騎士今場雖然完半場時落後5分，但3巨頭下半場嚟料，夾手夾腳轟入61分，其餘隊友加埋只係入6分都夠贏。占士喺賽前上社交網站話欠咗fans一場主場勝利，估唔到真係咁快就成功贖罪；佢攞到32分、12個籃板同10次助攻，以今季第一次、個人職業生涯第38次「大三元」，作為送畀擁躉第一場「主勝」嘅點綴。至於之前盛傳俾占士喺更衣室鬧過嘅控衞K艾榮，今場一樣入咗32分，助攻次數更加係個人今季新高嘅9次，不過最令佢開心嘅唔係個人數據：「今場勝仗別具意義，因為係我哋終於似番一隊波。」
教練不滿防守太hea
客軍塘鵝雖然輸波，但係內線核心安東尼戴維斯都話好開心有機會同「聯盟第一人」同場較技學吓嘢。開季着晒火嘅「一眉」今場都造出雙雙，但對手太強，所以自己都投晒降：「騎士有3個輕鬆起手都入到波嘅球員，完全打散我哋嘅防守。」進攻勁到連對手都讚，但係騎士教練布拉達就對球隊嘅防守唔係幾滿意喇；佢覺得班球員今場大部份時間嘅防守態度都好hea，仲話呢種表現令佢好不安同擔憂喎。
識睇，一定係睇足英台【英波Live】：
http://soccer.appledaily.com
http://bit.ly/engballlive