雖然話足球係團體運動，但近年啲國家隊越嚟越多《一個人的武林》，好似瑞典咁，前鋒伊巴謙莫域就啱啱歷來第9次兼連續第8次奪得瑞典足球先生，真係悶唔悶呀？諗番起喺90年代，瑞典足球百花齊放，淨係前線就已有K安達臣、布連同埋軒歷拿臣（圖）等出色球員，好睇好多。
講起拿臣，佢喺球員時代由「掃帚頭」踢到光頭，由翼鋒踢到前鋒，兩度斷腳都可以起番身，堪稱傳奇。現年43歲嘅拿臣喺掛靴之後，仲挑戰退休球星嘅死穴，就係教波嘞。畢竟，踢波叻唔代表教波叻，好多踢波勁嘅球員，教波就認真麻麻，「荷蘭三劍俠」係最好例子；不過，拿臣偏偏要向高難度挑戰，而暫時嚟講，又表現唔錯。
拿臣喺2013年年尾接手被視為降班膽嘅瑞超升班馬科根堡，但佢幫科根堡喺今季以1分之微成功護級，仲因為咁獲得母會希爾星堡嘅青睞，喺下季成為希堡嘅教頭。
文：吾中
以女性角度看球星新聞，唔用眉筆用原子筆寫低球壇百態！