一年一度嘅澳門格蘭披治大賽車本周四至周日（13至16日）舉行，澳博（880）再次冠名贊助舊年嘅冠軍車隊「德利賽車隊」落場鍊過。闊別澳門21年嘅德利賽車隊，舊年重臨澳門參賽，即刻再贏冠軍。有咁好成績，澳博當然亦都願意繼續大力支持，連續兩年做德利嘅冠名贊助。有澳博呢個大金主支持，德利都好識做，送個賽車頭盔畀澳博三位董事四太梁安琪、蘇樹輝同官樂怡。
四太身形嬌小，蘇、官二人一舉起個頭盔影相，竟然遮住四太個樣，望落好似帶咗個頭盔咁，四太之後拎開個頭盔都O咗嘴。德利賽車隊同澳博其實好有淵源，已故創辦人葉德利除咗有「格蘭披治先生」之稱，佢仲係澳博母公司澳娛創辦人之一，亦係賭王何鴻燊嘅妹夫。