如果我係歷史學家，以前嘅我，一定會研究係邊個賤人發明返工。不過如果你今日問我，我肯肯定會查出，到底係邊個人渣發明「禮金」。
「禮金呢啲唔使多嘅，拎個意頭得啦。」老豆自細教落：「女人，七個字，佢講咩，你掉轉諗。」憑未來外母嘅神情，加上一身典型內地土豪師奶嘅造型，我可以好肯定「唔使多」呢三個字，一定係大話！
作為一個專業世界仔經紀，你估我點會冇子彈在手就上陣呢，「咁其實我都有少少預算嘅。」嗱！又俾我估中，一講「預算」呢兩個字，外母那雙充滿期待嘅眼神已完全出賣佢，「我諗住禮金少少地，就10萬蚊，另外聽阿怡講，你地都想買下股票做投資，咁不如咁啦，另加3手滙控（005）。」此時，我擰向阿怡，展示一個充滿自信嘅笑容。
誰不知，人性醜陋嘅極限，原來係無止境的。當我將個頭再轉向未來外母時，我已Feel到地極磁場180倒轉。然後佢一句「得」過來：「好心你娶老婆就咪咁孤寒啦。」呢一句有如一刀直插心臟，孤寒？3手加埋都要近10萬，前後20萬，我普通打工仔一個咋，咁都唔夠體面？咁你想要咩？你同賣女有咩分別？
「我知你依家實諗我係咪賣女架。」「冇…唔會…點會呢。」呢啲深情戲，我認我交唔到。「未來女婿，你唔好介意，我份人係好直嘅，我唔係話嫌錢少。不過，你送隻唔識升唔識跌嘅股票俾我做咩野啫？」「咁其實我原意係想兩老有息收下，開心下。」
未來外父其實係存在喺呢個空間嘅，不過佢依家表演梗「鵪鶉食翅」。「未來女婿，你唔好以為我地喺大陸就咩都唔知，自從「滬港通」開車後，我都有研究港股，滙豐一年派4次息，每次每手派大約300蚊，扣埋手續費，即係一年得1000蚊咁大把，轉做人民幣，得番790蚊咁大把，我要來做乜？點解唔買好似王菲個男朋友嗰啲，一日爆升股，短炒賺個快錢。」
老人家，穩穩陣陣收下息過下日晨咪好，漢傳媒（491）呀、謝霆峰架，歌都有得你唱，「也許X股這條路 莊家的懷抱 炒爆讓你高攀進內才摔倒」。不過既然你鍾意高風險，嚿錢我就預咗俾你，你鍾意博，我咪由你囉。
「未來外母，一係咁，我最近聽個客講，話隻國企39XX好似有料到，『港股通』又有佢份，不過仙股，我幫你將10萬蚊買呢隻啦？」人性本賤，好哋哋有滙控又唔買，係鍾意買啲聽到你都唔知佢做咩嘅股票先開心，呢啲係咪叫犯賤。「呢隻會有咩動作先？」「個熟客日日幾球幾球咁掃，聽講有莊家想砌高到佢升兩倍。」「咁又好似幾好，你個熟客同你好熟架？」「都幫親咗我6、7年。」「咁應該冇問題啦，好似你頭先咁講，你用15萬買股票，買呢隻，再加10萬現錢禮金。」
未來外母講起大話上來，唔止面無懼色，仲可以笑笑口咁講，呢隻恐怕係傳說中嘅笑面虎；而未來外父依家轉咗表演「鵪鶉損骨」。鵪鶉配老虎，一定好命苦，真係戥未來外父可憐。「冇問題呀未來外母，我幫你處理。」「咁你又唔好表現出一副『習近平見安倍』嘅樣，我都俾隻股票俾你，當禮尚往來。我朋友個國企高層老公，都叫我地大手買隻上海股票XX9413，係『滬股通』，你放心去買。信得過！」
如是者，奴才完全遵照主子意思去辦，包括用未來外母個戶口，買39XX，同埋用自己戶口，狗衝XX9413。係架，我認我有口話人冇口話自己，咁人性本賤，我係人，中number降有咩問題？
＊一星期後＊
「未來女婿，你係咪跣我先，你叫我買隻39XX今日點解跌咁多？」收到呢一個微信，即時望下報價，嘩！跌咗成兩成！又係份蘋果踢爆間公司盤數有問題，毒果真係毒果，做咩咁毒我，盤數點衰，話知佢啦，有得炒咪得囉。
好在，冇得睇毒果，呢啲新聞其他傳媒又好明顯唔報得。大陸一日玩新聞封鎖，搵大陸人做水魚是常識吧？我覆佢，「應該係因為佔中。」呢個世界，無論發生咩事，都可以賴落佔中，呢期興。「應該冇事嘅。」我重申一次，俾咗出去嘅禮金，等如潑出去嘅水，升升跌跌，none of my生意。另我又強調，「應該冇事嘅。」純個人意見，但我唔排除判斷錯誤。
正當我個心泛起陣涼意，想叫小鳳姐出場時，我又收到另一個微信，「未來女婿，你好嗎？」OH！竟然係鵪鶉外父？「幾好」「冇，我想提你，上次我老婆叫你買隻XX9413，你小心啲，佢個消息來源上次叫佢買隻獐子島（002069），停牌到依家都未復牌。」
上網即Call Google神，毒果都有報過：
A 股水產股龍頭獐子島的扇貝醜聞，越揭越大。公司之前在10月底突然公佈，3年前斥資5億元（人民幣，下同）投放的扇貝苗，因遭遇異常冷水已全部死晒，令公司由上半年盈利轉為勁蝕8億元。但市場人士普遍質疑公司講法，認為所謂扇貝苗根本是子虛烏有，要起撈時才以天災掩飾。目前大量內地財經媒體派記者上島調查，場面墟冚，有記者稱，「現在獐子島上的記者，比扇貝還要多。」
完
by千頌C@堆填區